ಭ್ರಷ್ಟ ವ್ಯವಸ್ಥೆಗೆ ಬಲಿಯಾಯ್ತು ಪ್ರಾಮಾಣಿಕತೆ…!!!

image

ಮತ್ತೆ ಹುಟ್ಟಿ ಬನ್ನಿ ಡಿಕೆ ರವಿ...

ಒಂದು ನೀಚ ಭ್ರಷ್ಟ ವ್ಯವಸ್ಥೆ ಎಂತಹ ಪ್ರಾಮಾಣಿಕ, ಧಕ್ಷ ಅಧಿಕಾರಿಯ ಪ್ರಾಣವನ್ನಾದರೂ ಬಲಿ ಪಡೆಯುತ್ತೆ. ಅದಕ್ಕೆ ಮತ್ತೊಂದು ಉದಾಹರಣೆ ಡಿಕೆ ರವಿ ಅನುಮಾನಾಸ್ಪದ ಸಾವು. ಈ ಹಿಂದೆ ಇದೇ ರೀತಿ ದಕ್ಷತೆ ಮೆರೆದಿತ್ತ ಹಲವು ಅಧಿಕಾರಿಗಳು ಸಾವನ್ನಪ್ಪಿದ್ರು..
ಕರ್ನಾಟಕದ ಮಟ್ಟಿಗೆ ಕೆಎಎಸ್ ಅಧಿಕಾರಿ ಮಹಾಂತೇಶ್ ಕೊಲೆ ಮತ್ತು ಎಸ್ ಐ ಮಲ್ಲಿಕಾರ್ಜುನ ಬಂಡೆ. ಆದ್ರೆ ಕೆಲವೇ ದಿನಗಳಲ್ಲಿ ಇಷ್ಟು ದೊಡ್ಡಮಟ್ಟದಲ್ಲಿ ಹೆಸರು ಪಡೆದಿದ್ದವರು ಡಿಕೆ ರವಿ. ಕೋಲಾರದಲ್ಲಿ ಡಿಸಿಯಾಗಿ ಕೆಲಸ ಮಾಡಿದ ಅಷ್ಟೂ ದಿನ ಅಲ್ಲಿನ ಮರಳು ಮಾಫಿಯಾವನ್ನ ಉಸಿರೆತ್ತದಂತೆ ಮಾಡಿದ್ದು ಡಿಕೆ ರವಿ ಹೆಗ್ಗಳಿಕೆ. ಒಬ್ಬ ಅಧಿಕಾರಿ ವರ್ಗಾವಣೆಯಾದ್ರೆ ನಮ್ಮಲ್ಲಿ ಅಷ್ಟಾಗಿ ಪ್ರತಿಭಟನೆಗಳು ಆಗೋದಿಲ್ಲ. ಆದ್ರೆ ಡಿ ಕೆ ರವಿ ವರ್ಗಾವಣೆಯಾದಾಗ ಇಡೀ ಕೋಲಾರಕ್ಕೆ ಕೋಲಾರವೇ ವಿರೋಧಿಸಿತ್ತು. ಅಷ್ಟರಮಟ್ಟಿಗೆ ಡಿಕೆ ರವಿ ಜನಸ್ನೇಹಿಯಾಗಿದ್ದರು ಮತ್ತು ಜನಪರ ಕೆಲಸ ಮಾಡ್ತಾಯಿದ್ರು. ಕೋಲಾರದಲ್ಲಿ ಮರಳುಮಾಫಿಯಾವನ್ನ ಮಟ್ಟಹಾಕಿದ ರವಿಯವರನ್ನ ಸರ್ಕಾರ ಇದ್ದಕ್ಕಿದ್ದಂತೆ ವಾಣಿಜ್ಯ ತೆರಿಗ ಇಲಾಖೆಗೆ ವರ್ಗ ಮಾಡಿತ್ತು. ಐಎಎಸ್ ಅಧಿಕಾರಿಗಳಿಗೆ ಅಷ್ಟೇನು ಪ್ರಿಯವಲ್ಲದ ಇಲಾಖೆ ಅಂದ್ರೆ ಅದು ವಾಣಿಜ್ಯ ತೆರಿಗೆ ಇಲಾಖೆ. ಆದ್ರೆ ಸರ್ಕಾರದ ನಿರ್ಧಾರವನ್ನ ತುಂಬಾ ಖುಷಿಯಿಂದಲೇ ಸ್ವಾಗತಿಸಿ ಬೆಂಗಳೂರಿನಲ್ಲಿ ವಾಣಿಜ್ಯ ತೆರಿಗೆ ಹೆಚ್ಚುವರಿ ಆಯುಕ್ತರಾಗಿ ಧಕ್ಷತೆಯಿಂದ ಕೆಲಸ ಮಾಡ್ತಾಯಿದ್ರು. ಕಳೆದ ನಾಲ್ಕು ತಿಂಗಳಾವದಿಯಲ್ಲಿ ಬೆಂಗಳೂರು ಲ್ಯಾಂಡ್ ಮಾಫಿಯಾ ಮತ್ತು ರಿಯಲ್ ಎಸ್ಟೇಟ್ ವ್ಯವಹಾರ ಮಾಡೋ ಹಲವು ಕಂಪನಿಗಳ ಮೇಲೆ ರೇಡ್ ಮಾಡಿದ್ರು. ಕೇವಲ ನಾಲ್ಕು ತಿಂಗಳಲ್ಲಿ ಸರ್ಕಾರಕ್ಕೆ ತೆರಿಗೆ ವಂಚಿಸುತ್ತಿದ್ದ ರಿಯಲ್ ಎಸ್ಟೇಟ್ ಕಂಪನಿಗಳಿಂದ 120 ಕೋಟಿಗೂ ಅಧಿಕ ತೆರಿಗೆ ವಸೂಲಿ ಮಾಡಿದ್ರು. ಬಾಯಿಸತ್ತರವರ ಜಮೀನಿಗೆ ಬೇಲಿ ಸುತ್ತುತ್ತಿದ್ದವರನ್ನ ಅಕ್ಷರಶಃ ಎದುರುಹಾಕಿಕೊಂಡಿದ್ದರು ಡಿಕೆ ರವಿ. ಇಂತಹ ಆಧಿಕಾರಿ ಇನ್ನಷ್ಟು ವರ್ಚಗಳ ಕಾಲ ಕೆಲಸ ಮಾಡಿದ್ದಿದ್ರೆ ಭ್ರಷ್ಟರಪಾಲಿಗೆ ಸಿಂಹಸ್ವಪ್ನರಾಗಿರ್ತಿದ್ರು… ಆದ್ರೆ ಈ ಭ್ರಷ್ಟ ವ್ಯವಸ್ಥೆಗೆ ಬಲಿಯಾಗಿ ಹೋದ್ರು. ಅವರ ಸಾವು ಆತ್ಮಹತ್ಯೆಯೋ ಕೊಲೆಯೋ ಅಂತ ಈಗಲೇ ಊಹೆ ಮಾಡೋಕೆ ಸಾಧ್ಯವೇ ಇಲ್ಲ. ಒಂದು ವೇಳೆ ಅದು ಕೊಲೆಯಾಗಿದ್ರೂ ಅದು ಈ ವ್ಯವಸ್ಥೆ ಮಾಡಿದ ಕೊಲೆ. ಅದು ಆತ್ಮಹತ್ಯೆಯೇ ಆಗಿದ್ರೂ ಅದು ವ್ಯವಸ್ಥೆ ಆತ್ಮಹತ್ಯೆ ಮಾಡಿಕೊಳ್ಳುವಂತೆ ಮಾಡಿದ್ದ ಪ್ರಚೋದನೆ… ಡಿಕೆ ರವಿಯವರೆ ಮತ್ತೆ ಹುಟ್ಟಿ  ಬನ್ನಿ …..

ಧಕ್ಷ ಅಧಿಕಾರಿ ಸಾವಲ್ಲೂ ಶುರುವಾಯ್ತು ಹೊಲಸು ರಾಜಕೀಯ…

wpid-img-20150316-wa0045.jpg ಧಕ್ಷ ಅಧಿಕಾರಿಯ ಸಾವಲ್ಲೂ ರಾಜಕೀಯ ಮುಖಂಡರು ತಮ್ಮ ಬೇಳೆ ಬೇಯಿಸಿಕೊಳ್ಳೋಕೆ ಶುರು ಮಾಡಿದ್ದಾರೆ. ಪ್ರಕರಣದ ತನಿಖೆ ಇನ್ನೂ ಆರಂಭಿಕ ಹಂತದಲ್ಲಿರುವಾಗಲೇ ಪೊಲೀಸರನ್ನ ಪ್ರಶ್ನಿಸುವ ಕೆಲಸ ಮಾಡಿದ್ದಾರೆ ಈಶ್ವರಪ್ಪ. ಪ್ರಕರಣಕ್ಕೆ ರಾಜಕೀಯ ಬಣ್ಣ ನೀಡೋಕೆ ಬಿಜೆಪಿ ಸಿದ್ದತೆ ನಡೆಸಿರೋದಂತೂ ಸತ್ಯ.  ಕೆ.ಎಸ್‌ ಈಶ್ವರಪ್ಪ ವಿಕ್ಟೋರಿಯಾ ಆಸ್ಪತ್ರೆಗೆ ಭೇಟಿ ನೀಡಿದ್ದ ಈಶ್ವರಪ್ಪ, ಮಾದ್ಯಮಗಳೊಂದಿಗೆ ಮಾತನಾಡಿ ಮೇಲ್ನೋಟಕ್ಕೆ ರವಿ ಅವರದ್ದು ಆತ್ಮಹತ್ಯೆ ಎಂದ  ನಗರ ಪೊಲೀಸ್‌ ಆಯುಕ್ತ ಎಂ.ಎನ್‌ ರೆಡ್ಡಿ ಹೇಳಿದ್ದಾರೆ. ಇದು ಖಂಡನೀಯ. ಇಂತವರಿಂದ ಸರಿಯಾದ ರೀತಿಯಲ್ಲಿ ತನಿಖೆ ನಡೆಯಲು ಸಾಧ್ಯವಿಲ್ಲ. ಪ್ರಕರಣವನ್ನ ಸಿಬಿಐ ಅಥವಾ ಲೋಕಾಯುಕ್ತಕ್ಕೆ ವರ್ಗಾಯಿಸಿ ಅಂತ ಆಗ್ರಹಿಸಿದ್ದಾರೆ. ಇದ್ರ ಜೊತೆಗೆ ಪೊಲೀಸ್ ಕಮೀಷನರ್ ಎಂ ಎನ್ ರೆಡ್ಡಿ ವಿರುದ್ಧ ಕ್ರಮ ಕೈಗೊಳ್ಬೇಕು ಅನ್ನೋದು ಅವ್ರ ಒತ್ತಾಯ. ಪೊಲೀಸ್ ಆಯುಕ್ತರು ನಿನ್ನೆ ರಾತ್ರಿ ಮಾಧ್ಯಮಗಳಿಗೆ ಹೇಳಿದ್ದು ಮೇಲ್ನೋಟಕ್ಕೆ ಇದು ಆತ್ಮಹತ್ಯೆ ಅಂತ ಕಾಣ್ತಾಯಿದೆ. ಪ್ರಕರಣ ದಾಖಲಿಸಿಕೊಂಡಿದ್ದೇವೆ. ಸೂಕ್ತ ರೀತಿಯಲ್ಲಿ ತನಿಖೆ ಮಾಡ್ತಿವಿ ಅಂತ ಹೇಳಿದ್ರು. ಜವಾಬ್ದಾರಿಯುತ ಯಾವುದೇ ಅಧಿಕಾರಿಯಾದ್ರೂ ಇದೇ ಮಾತನ್ನ ಹೇಳ್ಬೇಕಿತ್ತು, ಎಂ ಎನ್ ರೆಡ್ಡಿ ಕೂಡ ಅದೇ ಹೇಳಿದ್ದಾರೆ. ಆದ್ರೆ ಈ ವಿಚಾರವನ್ನೂ ಕೂಡ ಈಶ್ವರಪ್ಪ ತಮ್ಮ ನಾಯಿಚಪಲಕ್ಕೆ ಬಳಸಿಕೊಂಡಿದ್ದಾರೆ. ಆದ್ರೆ ಈಶ್ವರಪ್ಪ ಹೇಳಿಕೆಗೆ ಕಮೀಷನರ್ ಎಂ ಎನ್ ರೆಡ್ಡಿ ಸೂಕ್ತ ರೀತಿಯಲ್ಲೇ ಉತ್ತರ ಕೊಟ್ಟಿದ್ದಾರೆ. ಬೆಂಗಳೂರು ಪೊಲೀಸ್ ಇಲಾಖೆಯ ಮುಖ್ಯಸ್ಥ ನಾನು. ನಾನು ಜವಾಬ್ದಾರಿಯಿಂದಲೇ ಮಾತನಡಿದ್ದೇನೆ. ಮೇಲ್ನೋಟಕ್ಕೆ ಇದು ಆತ್ಮಹತ್ಯೆ ಎಂದು ಹೇಳಿದ್ದೇನೆಯೇ ಹೊರತು, ಇದು ಆತ್ಮಹತ್ಯೆ ಅಂತ ಎಲ್ಲೂ ಹೇಳಿಲ್ಲ ಅಂತ ಈಶ್ವರಪ್ಪ ನವರಿಗೆ ತಿರುಗೇಟು ನೀಡಿದ್ದಾರೆ. ಪರಿಸ್ಥಿಯ ಲಾಭ ಪಡೆಯೋಕೆ ರಾಜಕೀಯ ಪಕ್ಷಗಳೇನೋ ಹೊಂಚು ಹಾಕುತ್ತಿವೆ. ಆದ್ರೆ ಮತ್ತೊಬ್ವರ ಸಾವಲ್ಲೂ ಹೊಲಸು ರಾಜಕೀಯ ಎಷ್ಟರಮಟ್ಟಿಗೆ ಸರಿ… ಇನ್ನು ಪೊಲೀಸರಿಗೆ ಪ್ರಕರಣವನ್ನ ಅರ್ಥ ಮಾಡಿಕೊಳ್ಳೋಕೆ ಸಾಕಷ್ಟು.ಸಮಯ ಬೇಕಾಗುತ್ತದೆ. ಮರಣೋತ್ತರ ವರದಿ ಪರೀಕ್ಷೆ ಬರಬೇಕಿದೆ, ರವಿ ಮತ್ತು ಅವರ ಕುಟುಂಬದವರ ಪೋನ್ ಕರೆಗಳ  ಪರಿಶೀಲನೆ ನಡೆಸಬೇಕಿದೆ. ಇನ್ನೂ ಹಲವರ ವಿಚಾರಣೆ ನಡೆಸಬೇಕಿದೆ. ಇಷ್ಟು ಬೇಗ ಪೊಲೀಸರ ತನಿಖೆ ಬಗ್ಗೆ ಅನುಮಾನ ಅಂತ ಹೇಳೋದು ಎಷ್ಟರ ಮಟ್ಟಿಗೆ ಸರಿ… ಪೊಲೀಸರಿಗೆ ಅವರ ಕೆಲಸ ಮಾಡಲು ಸ್ವಲ್ಪ ಸಮಯ ಬೇಕು. ಪ್ರಕರಣದ ತನಿಖೆ ಸರಿಯಾದ ರೀತಿಯಲ್ಲಿ ತನಿಖೆಯಾಗ್ಬೇಕು, ನಿಜಕ್ಕೂ ರವಿ ಅವರ ಸಾವಿಗೆ ಕಾರಣ ಏನು ಅನ್ನೋದು ಗೊತ್ತಾಗಲೇಬೇಕು. ಆದ್ರೆ ತನಿಖೆ ಮಾಡೋ ಪೊಲೀಸರಿಗೆ ಸ್ವಲ್ಪ ಸಮಯ ಬೇಕು… ಈಗಲೇ ಪೊಲೀಸರ ಮೇಲೆ ಅಪನಂಬಿಕೆ ಯಾಕೆ…

ಧಕ್ಷ ಐಎಎಸ್ ಅಧಿಕಾರಿ ಡಿಕೆ ರವಿ ಅನುಮಾನಾಸ್ಪದ ಸಾವು… ರಿಯಲ್ ಎಸ್ಟೇಟ್ ಮಾಫಿಯಾ ಬೆದರಿಕೆಗೆ ಬೇಸತ್ತು ಆತ್ಮಹತ್ಯೆ..?

10649933_748235241915900_2175252740324574967_n

ಐಎಎಸ್ ಅಧಿಕಾರಿ ಡಿಕೆ ರವಿ

ವಾಣಿಜ್ಯ ತೆರಿಗೆ ಇಲಾಖೆಯ ಹೆಚ್ಚುವರಿ ಆಯುಕ್ತರಾಗಿದ್ದ ಡಿಕೆ ರವಿ ಅನುಮಾನಾಸ್ಪದವಾಗಿ ಸಾವನ್ನಪ್ಪಿದ್ದಾರೆ. ಕೋರಮಂಗಲದ ಸೆಂಟ್ ಜಾನ್ ವುಡ್ ಅಪಾರ್ಟ್ ಮೆಂಟ್ ನ ಒಂಬತ್ತನೇ ಮಹಡಿಯ 903 ನೇ ಪ್ಲಾಟ್ ನಲ್ಲಿ ನೇಣುಭಿಗಿದ ಸ್ಥಿತಿಯಲ್ಲಿ ಡಿಕೆ ರವಿ ಮೃತದೇಹ ಪತ್ತೆಯಾಗಿದೆ. ಕೋಲಾರದಲ್ಲಿ ಜನಪ್ರಿಯ ಡಿಸಿಯಾಗಿ ಕೆಲಸ ಮಾಡಿದ್ದ ಡಿಕೆ ರವಿ ನಾಲ್ಕು ತಿಂಗಳ ಹಿಂದಷ್ಟೇ ವಾಣಿಜ್ಯ ತೆರಿಗೆ ಇಲಾಖೆ ಹೆಚ್ಚುವರಿ ಆಯುಕ್ತರಾಗಿ ಬೆಂಗಳೂರಿಗೆ ವರ್ಗವಾಗಿದ್ರು. ತಾವು ವಾಣಿಜ್ಯ ಇಲಾಖೆಗೆ ಬಂದ ನಂತ್ರ ಹಲವು ರಿಯಲ್ ಎಸ್ಟೇಟ್ ಕಂಪನಿಗಳ ಮೇಲೆ ದಾಳಿ ನಡೆಸಿ ವಂಚನೆಯಾಗಿದ್ದ ತೆರಿಗೆಯನ್ನ ವಸೂಲಿ ಮಾಡಿದ್ದರು. ಇದು ಹಲವು ರಿಯಲ್ ಎಸ್ಟೇಟ್ ಕುಳಗಳ ಕಣ್ಣು ಕೆಂಪಗೆ ಮಾಡಿದ್ದು ಸುಳ್ಳಲ್ಲ. ಮೂಲಗಳ ಪ್ರಕಾರ ಡಿಕೆ ರವಿ ಪೋನ್ ಗೆ ಹಲವು ದಿನಗಳಿಂದ ಬೆದರಿಕೆ ಕರೆಗಳು ಬರುತ್ತಿದ್ದವು ಎನ್ನಲಾಗಿದೆ. ನಾಲ್ಕು ದಿನದ ಹಿಂದೆ ಮುಂಬೈ ನಿಂದ ಭೂಗತ ಪಾತಕಿಯೊಬ್ಬ ಕರೆ ಮಾಡಿ ರಾಜೀನಾಮೆ ನೀಡುವಂತೆ ಬೆದರಿಸಿದ್ದರು ಎನ್ನಲಾಗಿದೆ. ಇದ್ರಿಂದಾಗಿ ಕಳೆದ ಕೆಲ ದಿನಗಳಿಂದ ಖಿನ್ನರಾಗಿದ್ದರು ಎಂದು ತಿಳಿದುಬಂದಿದೆ. ರಿಯಲ್ ಎಸ್ಟೇಟ್ ಮಾಫಿಯಾದ ಬೆದರಿಕೆಗೆ ಬೇಸತ್ತು ಆತ್ಮಹತ್ಯೆ ಮಾಡಿಕೊಂಡಿದ್ದಾರಾ ಅನ್ನೋ ಅನುಮಾನಗಳಿವೆ. ಈ ಹಿನ್ನೆಲೆಯಲ್ಲಿ ಪೊಲೀಸ್ರು ತನಿಖೆ ಮುಂದುವರೆಸಿದ್ದಾರೆ…

ನಾನು ಕೆಟ್ಟವಳು… ನನ್ನ ಮೇಲೆ ಅತ್ಯಾಚಾರ ಮಾಡಿ…!! ನಿರ್ಭಯಾ ಅತ್ಯಾಚಾರಿಗಳ ಪರ ವಕೀಲರಿಗೆ ಯುವತಿಯೊಬ್ಬಳ ಬಹಿರಂಗ ಪತ್ರ…

1920217_10152241509285985_850523354_n

ಅತ್ಯಾಚಾರಿಗಳ ಪರ ವಕೀಲರಿಗೆ ದಿಟ್ಟೆಯೊಬ್ಬಳ ಪತ್ರ

ನಿರ್ಭಯಾ ಅತ್ಯಾಚಾರಿ ಪರ ವಕೀಲರಿಗೆ ಯುವತಿಯೊಬ್ಬಳು ಬರೆದ ಬಹಿರಂಗ ಪತ್ರ ಬರೆದಿದ್ದಾಳೆ. ಆ ಪತ್ರದಲ್ಲಿ ಓರ್ವ ಯುವತಿಯ ಜವಾಬ್ದಾರಿ, ಕುಟುಂಬ ಜತೆಗಿನ ಆಕೆಯ ನಂಟು, ಸಮಾಜ ನಡೆಸಿಕೊಳ್ಳೋ ಪರಿ ಎಲ್ಲವನ್ನೂ ಆಕ್ರೋಶಭರಿತವಾಗಿ ವಿವರಿಸಿದ್ದಾಳೆ. ಅತ್ಯಾಚಾರಿ ಪರ ವಕೀಲರಿಗೆ ಯುವತಿ ಬರೆದ ಆ ಪತ್ರದಲ್ಲಿದೆ ನಗ್ನ ಸತ್ಯ

ನಾನೊಬ್ಬಳು ಕೆಟ್ಟ ಹುಡುಗಿ
ಬನ್ನಿ ನನ್ನ ಮೇಲೆ ಅತ್ಯಾಚಾರ ಎಸಗಿ
ರೇಪ್ ಮಾಡಿ ನನ್ನನ್ನ ಶಿಕ್ಷಿಸಿ

ಇಂತಹದೊಂದು ಬೆಚ್ಚಿಬೀಳಿಸುವಂತಹ ಸವಾಲಾಕಿರೋದು ಬೆಂಗಳೂರಿನ ಹುಡುಗಿ. ಹೀಗಂತ ಯುವತಿಯೊಬ್ಬಳು ನಿರ್ಭಯಾ ಅತ್ಯಾಚಾರ ಪ್ರಕರಣದ ಆರೀಓಪಿಗಳ ಪರ ವಕೀಲ ಎಂ ಎಲ್ ಶರ್ಮಾ ಗೆ ಬಹಿರಂಗ ಪತ್ರವನ್ನ ಬರೆದಿದ್ದಾಳೆ. ಇಂಡಿಯಾಸ್ ಡಾಟರ್ ಡಾಕ್ಯುಮೆಂಟರಿಯಲ್ಲಿ ಅತ್ಯಾಚಾರಿಗಳ ಪರ ವಕೀಲರು ಹೆಣ್ಣು ಮಕ್ಕಳಿ ಹೂ ಇದ್ದ ಹಾಗೆ, ಸಂಜೆ ನಂತ್ರ ಹೊರಗಡೆ ಬರಬಾರದು, ಕೆಟ್ಟ ಹುಡುಗಿಯರು ರಾತ್ರಿ ವೇಳೆ ಸಿನಿಮಾಗಳಿಗೆ ಹೋಗೋದು, ಓಡಾಡೋದು ಮಾಡ್ತಾರೆ. ಅಂತವರ ಮೇಲೆ ಅತ್ಯಾಚಾರಗಳು ನಡೆಯುತ್ತವೆ ಅಂತ ನಿರ್ಭಯಾ ಅತ್ಯಾಚಾರವನ್ನ ಸಮರ್ಥಿಸುವ ರೀತಿ ಮಾತಾಡಿದ್ದರು. ನಾನೊಬ್ಬಳು ಬ್ಯಾಡ್ ಗರ್ಲ್​, ತನ್ನ ಮೇಲೆ ಅತ್ಯಾಚಾರ ಎಸಗಿ ಅಂತ ಓಪನ್ ಲೆಟರ್ ಬರೆದಿದ್ದಾಳೆ.. ಈ ಲೆಟರ್ ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಪ್ರತಿಕ್ರಿಯೆ, ಬೆಂಬಲ ವ್ಯಕ್ತವಾಗಿದೆ… ಬೆಂಗಳೂರಿನಲ್ಲಿ ಕೆಲಸ ಮಾಡ್ತಾ ಇರೋ ಪಶ್ಚಿಮ ಬಂಗಾಳ ಮೂಲದ 23 ವರ್ಷದ ಮೌಮಿತಾ ಪಾಲ್ ಇಂತಹದೊಂದು ಸವಾಲಿನ ಪತ್ರವನ್ನ ಬರೆದಿದ್ದಾಳೆ.

Untitled

ಅತ್ಯಾಚಾರಿಗಳ ಪರ ವಕೀಲರಿಗೆ ದಿಟ್ಟೆಯೊಬ್ಬಳ ಪತ್ರ..!!

ನಾನು ಬೆಂಗಳೂರಲ್ಲಿ ಕೆಲಸ ಮಾಡ್ತಾ ಇರೋ ಯುವತಿ. ದಿನದ 10 ತಾಸು ಕಷ್ಟಪಟ್ಟು ನಾನು ಕೆಲ್ಸ ಮಾಡ್ತೀನಿ. ಇಲ್ಲವಾದ್ರೆ ನನ್ನನ್ನೇ ನಂಬಿರೋರಿಗೆ ಹೊಟ್ಟೆ ತುಂಬಿಸಲು ಸಾಧ್ಯವಾಗಲ್ಲ. ನಾನು ನನ್ನ ಕೆಲಸವನ್ನ ಪ್ರೀತಿಸ್ತೀನಿ. ಮನೆಯಿಂದ ದೂರ ಒಬ್ಬಂಟಿಯಾಗಿ ಕೆಲಸ ಮಾಡ್ತಾ ಇದ್ದೀನಿ. ನಾನು ಶಾರ್ಟ್ಸ್​ ಧರಿಸ್ತೀನಿ, ಬಿಯರ್ ಕುಡಿತೀನಿ, ಫ್ರೆಂಡ್ಸ್​ ಜತೆ ಲೇಟ್ ನೈಟ್ ಮೊವೀ ನೋಡ್ತೀನಿ. ತನ್ನ ಗೆಳೆಯರ ಜತೆ ಡೇಟಿಂಗ್ ಮಾಡ್ತೀನಿ. ನಾನೊಬ್ಬಳು ಬ್ಯಾಡ್​ ಗರ್ಲ್​. ಆದ್ರೆ ಕುಟುಂಬದವರನ್ನ ನಾನೆಷ್ಟು ಪ್ರೀತಿಸ್ತೀನಿ ಅನ್ನೋಸು ನಿಮಗೆ ಗೊತ್ತಿಲ್ಲ, ಪ್ರತಿ ದಿನ ರಾತ್ರಿ ನಾನೊಬ್ಬಳೇ ಅಳ್ತೀನಿ. ನಾನು ದೇವರನ್ನ ಪೂಜಿಸ್ತೀನಿ, ಎರಡು ತಿಂಗಳ ಕಾಲ ಉಪವಾಸ ಆಚರಸ್ತೀನಿ. ನಾನು ನಿಂದನೆ, ಕಿರುಕುಳವನ್ನೂ ಎದುರಿಸಿದ್ದೀನಿ. ಡೋಕ್ಯುಮೆಂಟ್ರಿಯಲ್ಲಿನ ನಿಮ್ಮ ಮಾತುಗಳನ್ನ ಕೇಳಿದ್ದೀನಿ. ಹೆಣ್ಣು ಒಂದು ಹೂವಾಗಿದ್ದು, ಗಂಡಸರು ಸದಾ ಅವ್ರನ್ನ ರಕ್ಷಿಸಬೇಕು ಅಂತ ಅಂದಿದ್ದೀರ. ನನ್ನ ಪೋಷಕರು ದೃಢನಿರ್ಧಾರ ಗಳನ್ನ ಕೈಗೊಳ್ಳೋ ಸಾಮರ್ಥ್ಯ ನೀಡಿದ್ದಾರೆ. ನನ್ನ ಪೋಷಕರು, ಗೆಳೆಯರು, ಸಹದ್ಯೋಗಿಗಳು ನನ್ನ ರಕ್ಷಕರಾಗಿದ್ದಾರೆ. ಆದ್ರೆ ನಿಮಗೆ ಇವಿಷ್ಟು ಸಂಜಸವಲ್ಲವೇ? ನಿಮ್ಮ ಪ್ರಕಾರ ನಿರ್ಭಯಾಳು ಕೆಟ್ಟ ಹುಡುಗಿ. ಅದಕ್ಕಾಗಿನೇ ಶಿಕ್ಷೆಯಾಗಿ ಆಕೆಯನ್ನ ರೇಪ್ ಮಾಡಿ ಕೊಲೆ ಮಾಡಲಾಗಿದೆ. ನಿಮಗೂ ಹೆಣ್ಣು ಮಗಳಿಲ್ಲವೇ? ಆಕೆಯನ್ನ ನೀವು ಪ್ರೀತಿಸೋದಿಲ್ಲವೇ? ನಿಮ್ಮ ತಾಯಿಯ ಕಷ್ಟ ಸುಖಗಳ ಬಗ್ಗೆ ನೀವು ಗಮನ ಹರಿಸಿದ್ದೀರಾ? ನಿಮ್ಮ ಹೆಂಡತಿಯ ಬೇಕು ಬೇಡಗಳನ್ನ ಪೂರೈಸಿದ್ದೀರಾ? ಈ ಎಲ್ಲಾ ಪ್ರಶ್ನೆಗಳಿಗೆ ನೀವು ಉತ್ತರ ನೀಡಬೇಕು. ಬಳಿಕ ನೀವು ನನ್ನನ್ನ ಶಿಕ್ಷಿಸಬಹುದು. ನನ್ನ ಮೇಲೆ ಅತ್ಯಾಚಾರ ಎಸಗಬಹುದು. ನಾನು ಆತ್ಯಾಚಾರಕ್ಕೊಳಗಾಗಲು ಕಾಯ್ತಾ ಇದ್ದೀನಿ, ಶಿಕ್ಷೆಯ ನಿರೀಕ್ಷೆಯಲ್ಲಿದ್ದೇನೆ, ಕೆಲ ಉತ್ತರಗಳ ನಿರೀಕ್ಷೆಯಲ್ಲಿದೇನೆ’

ಇಂತೀ ನಿಮ್ಮ,
ಮೌಮಿತಾ ಪಾಲ್
ಹೀಗೆ ಕೆಲ ನಗ್ನ ಸತ್ಯಗಳನ್ನ, ಹೆಣ್ಣಿನ ಭಾವನೆ ನೋವು, ಅಸಹಾಯಕತೆಯನ್ನ ತನ್ನ ಪತ್ರದಲ್ಲಿ ಬಿಡಿ ಬಿಡಿಯಾಗಿ ಬಿಡಿಸಿಟ್ಟಿದ್ದಾಳೆ. ಸಮಾಜ ಹೆಣ್ಣನ್ನ ನೋಡೋ ರೀತಿ, ಹೆಣ್ಣನ್ನ ಅರ್ಥೈಸಿರೋ ಪರಿಯನ್ನ ಪರೋಕ್ಷವಾಗಿ ಬರೆದಿದ್ದಾಳೆ.ಇಷ್ಟು ನೇರಾ ನೇರವಾಗಿ ಅತ್ಯಾಚಾರಿಗಳ ಪರ ನಿರ್ಲಜ್ಜತನದಿಂದ ವಾದಿಸಿದ ವಕೀಲರಿಗೆ ಪತ್ರ ಬರೆದಿದ್ದಾಳೆ… ಆನ್ ಲೈನ್ ನಲ್ಲಿ ಈ ಬಗ್ಗೆ ಅಭಿಯಾನ ಆರಂಬಿಸಿರೋ ಬೆಂಗಳೂರಿನ ಮೋಮಿತಾ ಪಾಲ್ ಈ ಪತ್ರ ಬರೆದಿದ್ದಾಳೆ. change.org ಮತ್ತು ಪೇಸ್ ಬುಕ್ ನಲ್ಲಿ ಈ ಬಗ್ಗೆ ಅಭಿಯಾನ ಆರಂಭಿಸಿದ್ದಾಳೆ. ಸುಮಾರು 20 ಸಾವಿರಕ್ಕೂ ಹೆಚ್ಚು ಮಂದಿ ಈಕೆಯ ಅಭಿಯಾನಕ್ಕೆ ಸಹಮತ ಸೂಚಿಸಿದ್ದಾರೆ… ಅತ್ಯಾಚಾರಿಗಳ ಪರ ಮಾತಾಡಿದ ಲಾಯರ್ ಗಳ ಬಗ್ಗೆ ಒಂದು ದಿಟ್ಟತನದ ಪ್ರತಿಭಟನೆ ವ್ಯಕ್ತಪಡಿಸಿದ್ದಾಳೆ ಈ ಹುಡುಗಿ… ಆಕೆಯ ಹೋರಾಟಕ್ಕೆ ನಿಮ್ಮ ಬೆಂಬಲವಿದ್ದರೆ ಈ ಲಿಂಕ್ ಕ್ಲಿಕ್ ಮಾಡಿ…

https://www.change.org/p/m-l-sharma-rape-me-punish-me?recruiter=22658762&utm_source=share_petition&utm_medium=facebook&utm_campaign=share_facebook_responsive&utm_term=des-lg-share_petition-custom_msg

ನಿರ್ಭಯಾ-ಇಂಡಿಯಾಸ್ ಡಾಟರ್… ನನಗನಿಸಿದ್ದು…

Nirbhaya Documentary

ಇಂಡಿಯಾಸ್ ಡಾಟರ್

ನಿರ್ಭಯಾ ಮೇಲೆ ನಡೆದ ಹೀನ ಸಾಮೂಹಿಕ ಅತ್ಯಾಚಾರ ಘಟನೆಯನ್ನ ಕಣ್ಣಿಗೆ ಕಟ್ಟುವಂತೆ ಇಂಡಿಯಾಸ್ ಡಾಟರ್ ನಲ್ಲಿ ಕಟ್ಟಿಕೊಡಲಾಗಿದೆ… ಅತ್ಯಾಚಾರಿಯ ನಿರ್ಲಜ್ಜ ಸಮರ್ಥನೆಯನ್ನ ಡಾಕ್ಯುಮೆಂಟರಿಯಲ್ಲಿ ಬಳಿಸಿಕೊಳ್ಳಲಾಗಿದೆ ಅನ್ನೋದನ್ನ ಬಿಟ್ರೆ ನಿಜಕ್ಕೂ ಡಾಕ್ಯುಮೆಂಟರಿ ಇಡೀ ಘಟನೆಯ ಕರಾಳತೆಗೆ ಕನ್ನಡಿ ಹಿಡಿದಂತಿದೆ. ಒಬ್ಬ ಅತ್ಯಾಚಾರಿಯನ್ನ ಸಂದರ್ಶಿಸಲು ನಿರ್ಧೇಶಕಿ ಲೆಸ್ಲಿ ವುಡ್ವಿನ್ ತೆಗೆದುಕೊಂಡ ಶ್ರಮವನ್ನ ಘಟನೆಯ ಪ್ರತ್ಯಕ್ಷ ಸಾಕ್ಷಿ ನಿರ್ಭಯಾಳ ಸ್ನೇಹಿತ. ಇಡೀ ಡಾಕ್ಯುಮೆಂಟರಿಯಲ್ಲಿ ಆತನ ಬಗ್ಗೆ ಅಷ್ಟಾಗಿ ವಿವರವೇ ಇಲ್ಲ. ಘಟನೆಯ ಬಗ್ಗೆ ಆತನಿಂದ ಯಾವುದೇ ಮಾಹಿತಿ ಪಡೆದಿಲ್ಲ. ಅತ್ಯಾಚಾರಿಯೊಬ್ಬನ ಅಸಹ್ಯ ಸಮರ್ಥನೆಯ ಬದಲಿಗೆ ಘಟನೆಯ ಪ್ರತ್ಯಕ್ಷ ಸಾಕ್ಷಿಯ ಹೇಳಿಕೆಯನ್ನ ಬಳಸಬೇಕಿತ್ತು. ಆದ್ರೆ ಅದು ನಿರ್ಧೇಶಕಿಯಿಂದ ಸಾಧ್ಯವಾಗಿಲ್ಲ…         ಆದ್ರೆ ಒಂದು ಗಂಟೆಯಿರುವ ಇಂಡಿಯಾಸ್ ಡಾಟರ್ ಡಾಕ್ಯುಮೆಂಟರಿ ಎರೆಡು ವರ್ಷದ ಹಿಂದೆ ನಡೆದುಹೋದ ಆ ಭೀಕರ ಅತ್ಯಾಚಾರದ ಕರಾಳ ದೃಶ್ಯಗಳನ್ನ ಕಣ್ಣಿಕೆ ಕಟ್ಟಿ ಕೊಡುತ್ತದೆ. ಡಾಕ್ಯುಮೆಂಟರಿಯಲ್ಲಿ ನಿರ್ಭಯಾಳ ಕನಸು, ಆ ಕನಸು ಹೆತ್ತವರ ಮುಂದೆಯೇ ಕಮರಿಹೋದ ರೀತಿ, ಆಕೆಯ ತಂದೆ ತಾಯಿಯ ಕಣ್ಣೀರು, ಒಂದಿನಿತೂ ಪಾಪ ಪ್ರಜ್ಞೆ ಇಲ್ಲದ ಅತ್ಯಾಚಾರಿಗಳು, ಅತ್ಯಾಚಾರಿಗಳ ಮನಸ್ಥಿತಿ, ಅತ್ಯಾಚಾರಿಗಳಿಗಿಂತಲೂ ನಿರ್ಲಜ್ಜತನದಿಂದ ಮಾತನಾಡುವ ಆರೋಪಿಗಳ ಪರ ವಕೀಲರು, ದೆಹಲಿಯಂತಹ ದೊಡ್ಡ ನಗರಗಳಲ್ಲಿನ ಸ್ಲಂ ನಲ್ಲಿರುವ ಬಡತನ, ಅಲ್ಲಿನ ವಾತಾವರಣ, ಅತ್ಯಾಚಾರಿಗಳ ಮನೆಯವರ ಅಸಹಾಯಕತೆ, ಮಕ್ಕಳೆಡೆಗಿನ ಅವರ ಸಮರ್ಥನೆ, ಇದ್ದ ಒಬ್ಬ ಮಗ ಜೈಲು ಪಾಲದ ಅನ್ನೋ ಅವರ ನೋವು, ನಿರ್ಭಯಾ ಅತ್ಯಾಚಾರವಾದ ನಂತ್ರ ನಡೆದ ದೊಡ್ಡ ಮಟ್ಟದ ಹೋರಾಟ, ಆ ನಂತರ ನ್ಯಾಯಾಲಯ ಆರೋಪಿಗಳಿಗೆ ದಂಡನೆ ನೀಡಿದ ವೇಗ ಎಲ್ಲವನ್ನೂ ಇಂಡಿಯಾಸ್ ಡಾಟರ್ ಡಾಕ್ಯುಮೆಂಟರಿ ಹೇಳಿಕೊಂಡು ಹೋಗುತ್ತೆ. ಕೇವಲ ನಿರ್ಭಯಾ ಅತ್ಯಾಚಾರ ಪ್ರಕರಣ ಮತ್ತು ಆ ನಂತರ ನಡೆದ ಹೋರಾಟ ಮಾತ್ರ ಟಿವಿಗಳಲ್ಲಿ ನೋಡಿದ್ದವರಿಗೆ ಇಡೀ ಘಟನೆಯ ಭೀಕರತೆ, ಅತ್ಯಾಚಾರಿಗಳ ನಿರ್ದಯತೆ ಎಲ್ಲವೂ ಕಣ್ಣ ಮುಂದೆ ಬಂದು ನಿಲ್ಲುತ್ತದೆ. ಇಡೀ ಡಾಕ್ಯುಮೆಂಟರಿಯನ್ನ ಒಂದೇ ಗುಕ್ಕಿನಲ್ಲಿ ನೋಡಿ ಮುಗಿಸಿದವರ ಕಣ್ಣಾಲಿಗಳು ನೀರು ಜಿನುಗುತ್ತವೆ. ಅಷ್ಟರ ಮಟ್ಟಿಗೆ ನಿರ್ಧೇಶಕಿ ಲೆಸ್ಲಿ ವುಡ್ವಿನ್ ಗೆದ್ದಿದ್ದಾರೆ.

ಆ ಊರಿನಲ್ಲಿ ಕಡುಬಡತನದಲ್ಲಿ ಆ ಮಗು ಹುಟ್ಟಿದಾಗ ಆ ಕುಟುಂಬ ಅದೆಷ್ಟು ಸಂಭ್ರಮ ಪಟ್ಟಿತ್ತು ಅಂದ್ರೆ ಊರವರಿಗೆಲ್ಲ ಸಿಹಿ ಹಂಚಿದ್ದರು. ಹೆಣ್ಣು ಮಗು ಹುಟ್ಟಿದ್ರೆ ಶಾಪ ಅನ್ನುವಂತಹ ಹಳ್ಳಿಯಲ್ಲಿ ನಿರ್ಭಯಾ ಹೆತ್ತವರನ್ನ ಹುಚ್ಚರಂತೆ ನೋಡಿದ್ದರು ಆ ಹಳ್ಳಿಯ ಜನ.ನಿರ್ಭಯಾ ಹೆತ್ತವರು ಬಡವರಾಗಿದ್ರೂ ಅವರ ಹೃದಯ ಶ್ರೀಮಂತಿಕೆಗೆ ಯಾರೂ ಸಾಟಿಯಿರಲಿಲ್ಲ.. ಡಾಕ್ಟರ್ ಆಗಬೇಕು ಅಂದುಕೊಂಡಿದ್ದ ಮಗಳ ಕನಸನ್ನ ಸಾಕಾರಗೊಳಿಸೋಕೆ ಆ ಕುಟುಂಬ ಊರಲ್ಲಿದ್ದ ಅಷ್ಟೂ ಆಸ್ತಿಯನ್ನೂ ಮಾರಿ ಆ ಹೆಣ್ಣುಮಗಳ ಓದಿಗಾಗಿ ಮೀಸಲಿಟ್ಟಿತ್ತು. ಆ ಕುಟುಂಬದ ಕಷ್ಟಗಳೆಲ್ಲವೂ ಮುಗಿದುಹೋಗೋಕೆ ಇನ್ನು ಕೇವಲ ಆರು ತಿಂಗಳುಗಳಷ್ಟೇ ಇದ್ವು… ಆರು ತಂಗಳು ಕಳೆದರೆ ತಮ್ಮ ಮಗಳು ಡಾಕ್ಟರ್ ಆಗಿ ಊರಿಗೆ ಬರ್ತಾಳೆ ಅನ್ನೋ ಕನಸು ಕಂಡಿದ್ದರು ಆ ತಂದೆ ತಾಯಿ. ಆದ್ರೆ ಆ ತಂದೆ ತಾಯಿಗಳ ಕಣ್ಣಲ್ಲೀಗ ಸಾಯುವವರೆಗೂ ಒರೆಸಲಾಗದ ಕಣ್ಣೀರೇ ಇದೆ. ತಮ್ಮ ಮಗಳಿಲ್ಲದೇ ಮತ್ತೆ ಬದುಕನ್ನ ಆರಂಭಿಸೋ ಉತ್ಸಾಹವೇ ಇಲ್ಲ ಆ ಅನಾಥ ತಂದೆ ತಾಯಿಗಳಿಗೆ.

ಅತ್ಯಾಚಾರ ಮಾಡಿದ ದುಷ್ಟರ ಕಣ್ಣಲ್ಲಿ ಒಂದಿಷ್ಟೂ ಪಾಪ ಪ್ರಜ್ಞೆ ಇಲ್ಲ ಅನ್ನೋದು ಡಾಕ್ಯುಮೆಂಟರಿಯನ್ನ ನೋಡಿದ್ರೆ ಗೊತ್ತಾಗುತ್ತೆ. ಅದ್ರಲ್ಲೂ ಮುಖೇಶ ಸಿಂಗ್ ತಾನೇನು ತಪ್ಪೇ ಮಾಡಿಲ್ಲ, ಅತ್ಯಾಚಾರದಂತಹ ಘಟನೆಗಳಲ್ಲಿ ಹುಡುಗಿಯರದ್ದೇ ಹೆಚ್ಚು ಜವಾಬ್ದಾರಿ ಇರುತ್ತೆ. ಆಕೆ ರಾತ್ರಿ ಒಂಬತ್ತು ಗಂಟೆ ಸಮಯದಲ್ಲಿ ತನ್ನ ಗೆಳೆಯನೊಂದಿಗೆ ಸಿನಿಮಾ ನೋಡಲು ಹೋಗಿದ್ದೇ ತಪ್ಪು, ಆಕೆ ಅತ್ಯಾಚಾರಕ್ಕೊಳಗಾಗಲು ಒಪ್ಪಿಕೊಳ್ಳಬೇಕಿತ್ತು, ಹೆಣ್ಣಯ ಮಕ್ಕಳು ಮನೆಗೆಲಸ ಮಾಡ್ಕೊಂಡಿರಬೇಕು ಅಂತ ಉಪದೇಶ ಮಾಡ್ತಾನೆ. ಇಷ್ಟಲ್ದ ತನಗೆ ಕೊಟ್ಟಿರೋ ಮರಣದಂಡನೆ ಶಿಕ್ಷೆಯಿಂದ ಮುಂದೆ ನಡೆಯೋ ಅತ್ಯಾಚಾರದಂತಹ ಘಟನೆಗಳಲ್ಲಿ ಅತ್ಯಾಚಾರಿಗಳು ಮಹಿಳೆಯರನ್ನ ಕೊಲ್ಲುತ್ತಾರೆ ಅಂತಾನೆ. ಈತನ ಮಾತುಗಳನ್ನ ಕೇಳಿದ್ರೆ ಅವನ ಹೀನ ಮನಸ್ಥಿತಿ, ನಿರ್ಧಯತೆ, ಮಾಡಿದ ತಪ್ಪಿನ ಬಗ್ಗೆ ಒಂದಿನಿತೂ ಇಲ್ಲದ ಪಶ್ಚಾತಾಪ ಡಾಕ್ಯುಮೆಂಟರಿ ನೋಡುತ್ತಿದ್ದವರಿಗೆ ಸಿಟ್ಟು ತರಿಸುತ್ತದೆ. ಅವತ್ತು ನಡುರಸ್ತೆಯಲ್ಲಿ ಸಿಕ್ಕವಳನ್ನ ಅಷ್ಟು ನಿರ್ಧಯವಾಗಿ ಅತ್ಯಾಚಾರ ಮಾಡಿದ ಕ್ರೂರ ಮನಸುಗಳ ದರ್ಶನವಾಗುತ್ತೆ. ಇದ್ರ ಜೊತೆಗೆ ಹಾಗೆ ಸಿಕ್ಕವಳನ್ನ ಅಷ್ಟು ಅದೆಷ್ಟು ಹಿಂಸಿಸಿ ಅತ್ಯಾಚಾರ ಮಾಡಿದ್ದಾರೆ ಅನ್ನೋದ್ರ ಭೀಕರತೆ ಕೂಡ ನಿಮಗೆ ಅರ್ಥವಾಗತ್ತೆ. ಅದು ಎಷ್ಟರ ಮಟ್ಟಿಗೆ ಅಂದ್ರೆ ಆಕೆಯೊಳಗೆ ರಾಡ್ ಹಾಕಿ ಆಕೆಯ ಕರುಳನ್ನ ಹೊರಗೆ ತೆಗೆಯುವಷ್ಟರ ಮಟ್ಟಿಗೆ. ಇಂತದ್ದೊಂದು ಭೀಕರ ಸಾಮೂಹಿಕ ಅತ್ಯಾಚಾರ ಇಲ್ಲಿಯವರೆಗೆ ನಡೆದಿರಲಿಲ್ಲ ಅನ್ನೋದೂ ಕೂಡ ಅರ್ಥವಾಗತ್ತೆ.

ಅತ್ಯಾಚಾರಿಗಳಿಗಿಂತಲೂ ನಿರ್ಲಜ್ಜತನದಿಂದ ಮಾತನಾಡಿರೋದು ಅವರ ಪರ ವಕೀಲರುಗಳು. ಮಹಿಳೆಯರು ಹೂ ಇದ್ದ ಹಾಗೆ, ಅವರನ್ನ ರಕ್ಷಣೆ ಮಾಡೋಕೆ ಒಬ್ಬ ಗಂಡು ಬೇಕೇ ಬೇಕು. ನೀವು ವಜ್ರವನ್ನ ರಸ್ತೆಯಲ್ಲಿಟ್ಟರೆ ಅದು ನಾಯಿ ಪಾಲಾಗುತ್ತೆ ಅಂತ ಮಾತಾಡುತ್ತಾನೆ ಅತ್ಯಾಚಾರಿಗಳ ಪರ ವಕೀಲ ಎಂ ಎಲ್ ಶರ್ಮ. ಇದಕ್ಕಿಂತಲೂ ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ ಮಾತಾಡಿರೋದು ಮತ್ತೊಬ್ವ ಲಾಯರ್ ಎಪಿ ಸಿಂಗ್. ತನ್ನ ಮಗಳೇನಾದರೂ ತಡರಾತ್ರಿ ಗೆಳೆಯನೊಂದಿಗೆ ಸಿನಿಮಾ ನೋಡಲು ಹೋದ್ರೆ ತಾನು ಎಲ್ಲರ ಮುಂದೆ ಬೆಂಕಿಯಿಟ್ಟು ಆಕೆಯನ್ನ ಸುಟ್ಟಾಕ್ತೀನಿ ಅಂತಾನೆ. ಇಂತಹ ಮರ್ಯಾದೆ ಬಿಟ್ಟ ಲಾಯರ್ ಗಳಿಂದ ನಮ್ಮ ಜನಕ್ಕೆ ಅದೇಗೆ ನ್ಯಾಯ ಸಿಗುತ್ತೋ ಆ ದೇವರೇ ಬಲ್ಲ. ಇಡೀ ಡಾಕ್ಯುಮೆಂಟರಿಯಲ್ಲಿ ಈ ಇಬ್ವರು ಲಾಯರ್ ಗಳ ಸಂಕುಚಿತ ಮನಸ್ಥಿತಿ, ನಿರ್ಲಜ್ಜತನ, ಗಂಡಿದ್ದರೆ ಮಾತ್ರ ಹೆಣ್ಣಿಗೆ ರಕ್ಷಣೆ ಅನ್ನೋ ವಾದದ ಹಿಂದೆನ ಇವರ ಕರಾಳ ಮುಖಗಳ ದರ್ಶನವಾಗುತ್ತೆ.

ಇಡೀ ಡಾಕ್ಯುಮೆಂಟರಿಯಲ್ಲಿ ಭಾರತೀಯ ಗಂಡಸರೆಲ್ಲ ಅತ್ಯಾಚಾರೀ ಮನಸ್ಥಿತಿಯವರು ಅಂತ ಎಲ್ಲೂ ಹೇಳಿಲ್ಲ. ಅತ್ಯಾಚಾರದಂತಹ ಘಟನೆಗಳು ಯಾಕೆ ನಡೆಯುತ್ತವೆ ಅನ್ನೊ ಪ್ರಶ್ನೆಗೆ ಹುಡುಕಾಟವಿದೆ. ಇದ್ರ ಜೊತೆಗೆ ನಿರ್ಭಯಾ ಅತ್ಯಾಚಾರ ಘಟನೆಯ ನಂತ್ರ ಇಡೀ ದೇಶ ಆಕೆಯ ಬೆನ್ನಿಗೆ ನಿಂತು ಹೋರಾಟ ಮಾಡಿದ್ದನ್ನ , ಪೊಲೀಸರ ಕ್ಷಿಪ್ರ ತನಿಖೆಯನ್ನ,ನ್ಯಾಯಾಲಯದ ತ್ವರಿತ ವಿಚಾರಣೆಯನ್ನ ಹೇಳುತ್ತೆ. ಅದೆಲ್ಲದಕ್ಕೂ ಆ ಒಂದು ಹೋರಾಟ ಬಲ ತಂದುಕೊಟ್ಟಿತ್ತು. ಬಹುಶಃ ಜಗತ್ತಿನ ಯಾವ ದೇಶದಲ್ಲೂ ಮಹಿಳೆಯೊಬ್ಬಳ ಮೇಲೆ ನಡೆದ ಅತ್ಯಾಚಾರವನ್ನ ಇಷ್ಟು ದೊಡ್ಡ ಮಟ್ಟದಲ್ಲಿ ಖಂಡಿಸಿರಲಿಲ್ಲ. ಅಂತಹ ಹೋರಾಟವನ್ನ ಭಾರತೀಯರು ಮಾಡಿದ್ದಾರೆ ಅನ್ನೋ ದನ್ನೂ ಪರಿಣಾಮಕಾರಿಯಾಗಿ ಚಿತ್ರಿಸಲಾಗಿದೆ. ಆದ್ರೆ ಇಡೀ ಡಾಕ್ಯುಮೆಂಟರಿಯ ಒಂದೇ ಒಂದು ಕೊರತೆ ನಿರ್ಭಯಾ ಸ್ನೇಹಿಯನ ಅನುಪಸ್ಥಿತಿ. ಇಡೀ ಘಟನೆಯ ಪ್ರತ್ಯಕ್ಷ ಸಾಕ್ಷಿ ಆತ. ಆದ್ರೆ ಆತನ ಒಂದೇ ಒಂದು ಹೇಳಿಕೆ ಕೂಡ ಡಾಕ್ಯುಮೆಂಟರಿಯಲ್ಲಿಲ್ಲ. ಒಬ್ಬ ಅತ್ಯಾಚಾರಿಯ ಹೀನ ಸಮರ್ಥನೆಯನ್ನ ಹೇಳಲು ಹೊರಟವರು ನಿರ್ಭಯಾಳ ಗೆಳೆಯನನ್ನ ಮಾತಾಡಿಸಬೇಕಿತ್ತು.. ಹಾಗೆ ಆಗಿದ್ದಿದ್ರೆ ಇಡೀ ಡಾಕ್ಯುಮೆಂಟರಿಯ ತೂಕ ಇನ್ನಷ್ಟು ಹೆಚ್ಚಾಗ್ತಾಯಿತ್ತು. ಈ ಡಾಕ್ಯುಮೆಂಟರಿಯನ್ನ ನಿರ್ಭಂದ ಮಾಡುವಂತದ್ದು ಏನೂ ಇಲ್ಲ. ಆ ಒಂದು ಅತ್ಯಾಚಾರಿಯ ಸಮರ್ಥನೆಯನ್ನ ಬಿಟ್ಟು. ಅದನ್ನ ತೆಗೆದುಹಾಕಿ ಭಾರತೀಯರಿಗೆ ಇದನ್ನ ನೋಡುವ ಅವಕಾಶ ಸಿಗುವಂತೆ ಸರ್ಕಾರ ಮಾಡಬೇಕಿದೆ. ಹಾಗೆ ಮಾಡಿದ್ರೆ ಇಡೀ ಘಟನೆಯ ಭೀಕರತೆ ನಮ್ಮ ಜನರಿಗೆ ಅರ್ಥವಾಗುತ್ತೆ.

-ಶಶಿವರ್ಣಂ

 

ಒಬ್ಬ ಅತ್ಯಾಚಾರಿಯ ಮನಸ್ಥಿತಿಯನ್ನ ಅರ್ಥ ಮಾಡಿಕೊಳ್ಳುವುದು ಎಂತ ಪತ್ರಿಕೋದ್ಯಮ…

image

ಇದೆಂತಾ ಪತ್ರಿಕೋದ್ಯಮ…

      ಮತ್ತೆ ಅಂತಹ ಹೀನ ಕೃತ್ಯ ಯಾವ ಹೆಣ್ಣು ಮಗಳ ಮೇಲೂ ಆಗಬಾರದು. ಅಂತಾದ್ದೊಂದು ಹೀನ ಸಾಮೂಹಿಕ ಅತ್ಯಾಚಾರ ಎರೆಡು ವರ್ಷಗಳ ಹಿಂದೆ ನಿರ್ಭಯಾಳ ಮೇಲೆ ನಡೆದು ಹೋಗಿತ್ತು. ಅದಾದ ನಂತ್ರ ಇಡೀ ದೇಶ ನಿರ್ಭಯಾಳಿಗಾಗಿ ಹೋರಾಟ ಮಾಡಿತ್ತು. ಹದಿಮೂರು ದಿನಗಳ ಕಾಲ ಬದುಕಿನೊಂದಿಗೆ ಹೋರಾಟ ಮಾಡಿದ ಆ ಹೆಣ್ಣು ಮಗಳು ಕೊನೆಗೆ ಶರಣಾಗಿದ್ದು ಸಾವಿಗೆ. ಆರು ಮಂದಿ ಮನುಷ್ಯ ರೂಪದ ಮೃಗಗಳು ಆ ಹೆಣ್ಣುಮಗಳ ಮೇಲೆ ಸಾಮೂಹಿಕವಾಗಿ ಅತ್ಯಾಚಾರ ಮಾಡಿದ್ದರು. ಅಷ್ಟೇ ಅಲ್ಲ ಆಕೆಯ ಮೇಲೆ ಕಬ್ವಿಣದ ರಾಡ್ ನಿಂದ ಹಲ್ಲೆ ನಡೆಸಲಾಗಿತ್ತು. ಈಗ ಆ ಅಮಾನವೀಯ ಅತ್ಯಾಚಾರದಲ್ಲಿ ಭಾಗಿಯಾಗಿದ್ದವನೊಬ್ಬ ಡಾಕ್ಯುಮೆಂಟರಿಗೆಂದು ಸಂದರ್ಶನ ನೀಡಿದ್ದಾನೆ. ಅತ್ಯಾಚಾರ ನಡೆದ ಬಸ್ ಡ್ರೈವರ್ ಆಗಿದ್ದ ಮುಖೇಶ್ ಸಿಂಗ್ ನನ್ನ ‘ ಇಂಡಿಯಾಸ್ ಡಾಟರ್ ‘ ಡಾಕ್ಯುಮೆಂಟರಿಗಾಗಿ ಸಂದರ್ಶಿಸಲಾಗಿದೆ. ಆ ಡಾಕ್ಯುಮೆಂಟರಿ ಇದೇ ಭಾನುವಾರ ಅಂದರೆ ವಿಶ್ವ ಮಹಿಳಾ ದಿನದಂದು ಬಿಬಿಸಿ ಮತ್ತು ಎನ್ ಡಿ ಟಿವಿಯಲ್ಲಿ ಪ್ರಸಾರವಾಗಲಿದೆ. ಒಬ್ಬ ಅತ್ಯಾಚಾರಿಯನ್ನ ಸಂದರ್ಶನ ಮಾಡುವುದು ಎಷ್ಟರ ಮಟ್ಟಿಗೆ ಸರಿ ಅನ್ನುವುದು ಈಗಿನ ಪ್ರಶ್ನೆ. ಮಾನವೀಯತೆಯನ್ನ ಮರೆತು ಅಸಹಾಯಕಳ ಮೇಲರಗಿದ ಕ್ರೂರ ಮೃಗಕ್ಕೆ ವೇದಿಕೆ ನೀಡುವುದು ಎಷ್ಟರಮಟ್ಟಿಗೆ ಸಮ್ಮತ. ಒಂದು ವೇಳೆ ಆ ಅತ್ಯಾಚಾರಿ ತಾನು ಮಾಡಿದ ಕೃತ್ಯಕ್ಕೆ ಪಶ್ಚಾತಾಪ ಪಡುವಂತಹ ಮಾತುಗಳನ್ನಾಡಿದ್ದಿದ್ದರೆ ಆ ಸಂದರ್ಶನವನ್ನ ಒಪ್ಪಬಹುದಿತ್ತೇನೋ… ಆದ್ರೆ ಆ ಅಸಹ್ಯ ನಾಯಿ ಸಂದರ್ಶನದಲ್ಲಿ ಹೇಳಿರೋದು ಏನು ಗೊತ್ತಾ…?

* ಅವತ್ತು ನಡೆದ ಅತ್ಯಾಚಾರ ಮತ್ತು ಮಾರಣಾಂತಿಕ ಹಲ್ಲೆ ಆಕಸ್ಮಿಕ.
* ರೇಪ್ ಗೆ ಹುಡುಗನಿಗಿಂತ ಹುಡುಗಿಯೇ ಹೆಚ್ಚು ಜವಾಬ್ದಾರಿಯಾಗಿರುತ್ತಾಳೆ.
* ಒಂದು ಕೈನಿಂದ ಚಪ್ಪಾಳೆ ತಟ್ಟಲು ಸಾಧ್ಯವಿಲ್ಲ
* ರಾತ್ರಿ ಸಮಯದಲ್ಲಿ ಓಡಾಡುವುದು ಮಹಿಳೆಯರ ತಪ್ಪು.
* ಅತ್ಯಾಚಾರಕ್ಕೆ ಸಹಕರಿಸಿದ್ದಿದ್ದರೆ ನಾವು ಹಲ್ಲೆ ಮಾಡುತ್ತಿರಲಿಲ್ಲ
* ನಾವು ರೇಪ್ ಮಾಡುವಾಗ ಅವರು ತಿರುಗಿ ಬೀಳಬಾರದಿತ್ತು, ರೇಪ್ ಮಾಡಲು ಅವಕಾಶ ಮಾಡಿಕೊಡಬೇಕಿತ್ತು.
* ರಾತ್ರಿ ಒಂಬತ್ತು ಘಂಟೆಯ ನಂತರ ಒಳ್ಳೆಯ ಹುಡುಗಿಯರಾರೂ ಹೊರಗೆ ಓಡಾಡುವುದಿಲ್ಲ.
* ಹುಡುಗಿಯರು ಮನೆಗೆಲಸ ಮಾಡಿಕೊಂಡಿರಬೇಕು, ಪಾರ್ಟಿಗಳಿಗೆ ಹೋಗುವಂತಿಲ್ಲ.
* ತನಗೆ ನೀಡಿರುವ ಗಲ್ಲುಶಿಕ್ಷೆಯಿಂದ ಇನ್ನು ಮುಂದೆ ಅತ್ಯಾಚಾರದ ಸಂತ್ರಸ್ಥರಿಗೆ ತೊಂದರೆಯಾಗಲಿದೆ.
* ಇನ್ನು ಮುಂದೆ ಅತ್ಯಾಚಾರ ಮಾಡಿದ ನಂತರ ಆಕೆಯನ್ನ ಕೊಲ್ಲುತ್ತಾರೆ.
* ಮೊದಲಾಗಿದ್ದರೆ ಯಾರಿಗೂ ಹೇಳುವುದಿಲ್ಲ ಎಂದು ಬಿಟ್ಟುಬಿಡುತ್ತಿದ್ದರು.
* ಕೇವಲ ಇಪ್ಪತ್ತು ಪರ್ಸೆಂಟ್ ಹುಡುಗಿಯರು ಮಾತ್ರ ಒಳ್ಳೆಯವರು.

ಇಷ್ಟೆಲ್ಲ ಲೆಕ್ಚರಿಂಗ್ ಕೊಟ್ಟಿದ್ದಾನೆ ಅತ್ಯಾಚಾರ ಮಾಡಿದ್ದ ಮುಖೇಶ್ ಸಿಂಗ್. ತಾನು ಮಾಡಿರುವ ತಪ್ಪಿನ ಬಗ್ಗೆ ಪಾಪಪ್ರಜ್ಞೆ ಕಾಡುವ ಯಾವನೇ ಆಗಲಿ ಇಂತಹ ಮಾತುಗಳನ್ನಾಡುವುದಿಲ್ಲ. ನಿರ್ಭಯಾ ಮೇಲೆ ಅತ್ಯಾಚಾರ ಮಾಡಿದ್ದ ರಾಮ್ ಸಿಂಗ್ ಎಂಬಾತ ತಾನು ಮಾಡಿದ ತಪ್ಪಿನಿಂದ ಪಾಪ ಪ್ರಜ್ಞೆ ಕಾಡಿ ಜೈಲಿನಲ್ಲಿಯೇ ಆತ್ಮಹತ್ಯೆ ಮಾಡಿಕೊಂಡಿದ್ದ. ಮಾಡಿದ ತಪ್ಪಿಗೆ ತನಗೆ ತಾನೇ ಶಿಕ್ಷೆ ಕೊಟ್ಟುಕೊಂಡಿದ್ದ. ಆದ್ರೆ ಈ ಮುಖೇಶ್ ಸಿಂಗ್ ತಾನು ಮಾಡಿದ ಹೀನ ಕೃತ್ಯವನ್ನ ಲಜ್ಜೆಗೆಟ್ಟು ಸಮರ್ಥಿಸಿಕೊಳ್ಳುತ್ತಿದ್ದಾನೆ. ಇವನಿಗಿಂತ ಲಜ್ಜೆಗೆಟ್ಟವರು ಇವನನ್ನ ಸಂದರ್ಶನ ಮಾಡಿದವರು ಮತ್ತು ಅದನ್ನ ಪ್ರಸಾರ ಮಾಡಿ ಮಹಿಳೆಯರಿಗೆ ನ್ಯಾಯ ಒದಗಿಸುತ್ತೇವೆ ಅಂತ ಮಾತನಾಡುತ್ತಿರುವವರು.

ಇಂತ ಒಂದು ಸಂದರ್ಶನ ಮಾಡಿರೋದು ಕೂಡ ಒಬ್ವ ಮಹಿಳೆ ಅನ್ನೋದು ನಾಚಿಕೆಗೇಡಿನ ವಿಷಯ. ಲೆಸ್ಲಿ ವುಡ್ವಿನ್ ಎಂಬಾಕೆ ಈ ಸಂದರ್ಶನ ಮಾಡಿದ್ದಾಳೆ. ದೆಹಲಿಯಲ್ಲಿ ನಡೆದ ಆತ್ಯಾಚಾರ ಪ್ರಕರಣ ಅತ್ಯಂತ ಹೀನ ಕೃತ್ಯ. ಇಂತಹ ಹೀನ ಕೃತ್ಯವನ್ನ ಕಥೆಯಾಗಿ ಕಟ್ಟಿಕೊಡುತ್ತೇನೆ ಅಂತಿದ್ದಾಳೆ. ಒಂದು ಒಳ್ಳೆಯ ಉದ್ದೇಶಕ್ಕಾಗಿ ಡಾಕ್ಯುಮೆಂಟರಿ ಮಾಡಿದ್ದಿದ್ದರೆ ಎಲ್ಲರೂ ಈಕೆಯನ್ನ ಗೌರವಿಸುತ್ತಿದ್ದರೇನೋ. ಆದ್ರೆ ಈಕೆ ಅತ್ಯಾಚಾರಿಯೊಬ್ಬನಿಗೆ ವೇದಿಕೆ ಒದಗಿಸಿಕೊಟ್ಟಿದ್ದಾಳೆ. ಅದೂ ಆತ ತಾನು ಮಾಡಿರುವ ಕೃತ್ಯವನ್ನ ನಿರ್ಲಜ್ಜತನದಿಂದ ಸಮರ್ಥಿಸಿಕೊಂಡಿರೋದನ್ನ ಈಕೆ ಜಗತ್ತಿಗೆ ತೋರಿಸಿ ಅದೇನನ್ನ ಸಾಧಿಸುತ್ತಾಳೋ ಗೊತ್ತಿಲ್ಲ. ಆತ ತಾನು ಮಾಡಿರುವ ಕೃತ್ಯವನ್ನ ತಪ್ಪು ಅಂತ ಒಪ್ಪಿಕೊಂಡು ಪಶ್ಚಾತಾಪ ಪಟ್ಟಿದ್ದರೆ ಈ ಡಾಕ್ಯುಮೆಂಟರಿಯನ್ನ ಒಪ್ಪಿಕೊಳ್ಳಬಹುದಿತ್ತೇನೋ. ಆದ್ರೆ ಅತ್ಯಾಚಾರಿಯೊಬ್ಬನ ವಿಕೃತ ಸಮರ್ಥನೆಯನ್ನ ಯಾವ ನಾಗರೀಖ ಸಮಾಜವೂ ಒಪ್ಪಿಕೊಳ್ಳುವುದಿಲ್ಲ. ಇಂತಹ ಒಂದು ಸಂದರ್ಶನವನ್ನ ಮಾಡ್ತಾಯಿರೋದು ಆ ಅತ್ಯಾಚಾರಿಯ ಮನಸ್ಥಿತಿಯನ್ನ ಅರ್ಥ ಮಾಡಿಕೊಳ್ಳುವುದಕ್ಕಂತೆ. ನಾಚಿಕೆಯಾಗಬೇಕು ಇಂತ ಮಾತುಗಳನ್ನ ಹೇಳುವುದಕ್ಕೆ.. ಒಬ್ವ ಹೆಣ್ಣು ಮಗಳನ್ನ ಅಮಾನವೀಯವಾಗಿ ಅತ್ಯಾಚಾರ ಮಾಡುವವನ ಮನಸ್ಥಿತಿ ಎಂತಾದ್ದು ಅನ್ನೋದು ಎಲ್ಲರಿಗೂ ಗೊತ್ತಾಗುತ್ತೆ. ಅದನ್ನ ಮತ್ತೆ ಸಂದರ್ಶನ ಮಾಡಿ ನೋಡಬೇಕಾದ ಅವಶ್ಯಕತೆಯೂ ಇಲ್ಲ. ಅಂತಹ ಅಸಹ್ಯ ಮನುಷ್ಯ ರೂಪದ ಮೃಗಗಳಿಗೆ ವೇದಿಕೆ ಕಲ್ಪಿಸಿಕೊಡುವ ಅಗತ್ಯವೂ ಇಲ್ಲ. ಎಲ್ಲ ಸ್ಟೋರಿಗಳಿಗೆ ಬೇರೆಯದ್ದೇ ಆದ ಒಂದು ಮುಖ ಇರುತ್ತೆ… ಆ ಮುಖವನ್ನ ನಾವು ಈ ಡಾಕ್ಯುಮೆಂ.ಟರಿಯಲ್ಲಿ ತೋರಿಸ್ತೀವಿ ಅಂತಾರೆ. ದೆಹಲಿಯ ನ್ಯಾಯಾಲಯ ಅತ್ಯಾಚಾರ ಮಾಡಿದ ಕಾಮುಕರಿಗೆ ಮರಣದಂಡನೆ ವಿಧಿಸಿದೆ. ಈ ನೆಲದ ಕಾನೂನು ಆ ಘೋರ ಅಪರಾಧ ಮಾಡಿದವರಿಗೆ ಶಿಕ್ಷೆಯನ್ನೂ ನೀಡಿದೆ. ನ್ಯಾಯಾಲಯ ಅಪರಾಧಿಗಳು ಅಂತ ಹೇಳಿ ಶಿಕ್ಷೆ ಕೊಟ್ಟ ಮೇಲೆ ಇವರು ಇನ್ನೊಂದು ಮುಖ ಅಂದರೆ ಏನನ್ನ ತೋರಿಸುತ್ತಾರೆ. ಸಂದರ್ಶನ ಮಾಡುವವರು ತೋರಿಸುತ್ತಿರುವುದು ಅತ್ಯಾಚಾರಿಯೊಬ್ಬನ ಕರಾಳ ಮುಖವನ್ನ. ಎನ್ ಡಿ ಟಿವಿ ಮತ್ತು ಬಿಬಿಸಿ ಯಂತಹ ದೊಡ್ಡ ನ್ಯೂಸ್ ಚಾನಲ್ ಗಳಿಂದ ಯಾರೊಬ್ಬರೂ ಇಂತದ್ದೊಂದು ಹುಚ್ಚು, ವಿಕೃತ ನಡೆಯನ್ನ ನಿರೀಕ್ಷೆ ಮಾಡಿರಲಿಲ್ಲ. ಸದ್ಯಕ್ಕೆ ಸರ್ಕಾರ ಈ ಡಾಕ್ಯುಮೆಂಟರಿಯನ್ನ ಪ್ರಸಾರ ಮಾಡದಂತೆ ನಿಷೇಧ ಮಾಡಿದೆ. ಒಂದು ವೇಳೆ ಅದು ಪ್ರಸಾರವಾಗಿದ್ದೇ ಆದ್ರೆ ಅದು ನಿರ್ಭಯಾ ಮತ್ತು ಆಕೆಯಂತೆ ಅತ್ಯಾಚಾರಕ್ಕೊಳಗಾದ ನೂರಾರು ಅಮಾಯಕ ಮಹಿಳೆಯರಿಗೆ ಮಾಡಿದ ಅವಮಾನವಷ್ಟೇ…. ಒಬ್ಬ ಅತ್ಯಾಚಾರಿಯ ಮನಸ್ಥಿತಿಯನ್ನ ಅರ್ಥ ಮಾಡಿಕೊಳ್ಳುವುದು ಯಾವ ರೀತಿಯ ಪತ್ರಿಕೋದ್ಯಮ. ಇಷ್ಟು ಕೆಳಮಟ್ಟಕ್ಕೆ ಇಳಿದು ಪತ್ರಿಕೋದ್ಯಮ ಮಾಡಬೇಕಾ… ನಾಚಿಕೆಯಾಗಬೇಕು…

%d bloggers like this: